Sviðsmyndin "fjarnám og kennsla fyrir alla" - getur jafnað aðgengi barna að námi tímabundið

Grunnskólar geta jafnað aðgengi nemenda að námi og lágmarkað smithættu með fjarnámi og kennslu. Ein leið til þess að bregðast við þessu fordæmalausa ástandi í samkomubanni er að taka upp fjarnám og kennslu fyrir alla nemendur og gera ekki greinarmun á nemendum sem mæta í skólann og þeim sem eru heima. Þá er hreinlega hægt að mælast til þess að þau börn sem geta verði heima að miklu leyti. Einhverjir munu kjósa að halda börnunum sínum heima og svo auðvitað þau sem eru viðkvæm fyrir og verða eðli málsins samkvæmt að vera heima. Kennarar og forsvarsmenn skólanna geta skipulagt að nemendur komi í skólann í smærri hópum og hitta kennarann sinn og jafnvel nokkra aðra nemendur í senn. Þetta gætu verið stuttir fundir, göngur eða útileikir eða kennsla eða allt í bland.

Þannig er líka hægt að nýta starfskrafta þeirra kennara sem eru viðkvæmir heilsufarslega fyrir. Það er þá ekki gerður greinarmunur á því hveldur hvort kennarinn er á staðnum eða ekki. Margir verða á staðnum, í það minnsta nógu margir til að taka á móti þeim sem verða í skólanum hverju sinni. 

Auðveldast er að skipuleggja fjárnám með börnum á til dæmis mið og unglingastigi. Í mörgum skólum eru nemendur nú þegar orðnir þjálfaðir í því að nota vefumhverfi til þess að taka við verkefnum frá kennurum sínum og eru jafnvel með skjáinn fyrir framan sig á hverjum degi og þar sem staðan er þannig er auðvelt að byggja á því.

Með því að fjarnám og kennsla létti á þeim fjölda nemenda sem eru í skólunum hverju sinni verður auðveldara fyrir skólana að stýra þeim nemendum sem er staddir á svæðinu hverju sinni og draga út líkunum á því að smit berist á milli manna.  

Þau börn sem eiga foreldra sem eru ekki á heimilinu yfir daginn geta stundað nám í skólanum en á sömu forsendum og hin börnin. Þannig hafa nemendur heima sem eiga foreldra sem eru hvort eð er heima, eru í sótthví eða einangrun - sama aðgengi að námi og hin börnin sem mæta í skólann. 

• Lykilatriði í fjarnámi og kennslu er að nýta tækifærið og slá tvær til þrjár flugur í einu höggi með samþættingu námsgreina. Leyfa nemendum að taka þátt í að velja viðfangsefnin. 

• Lykilatriði er að kennarinn fikri sig áfram og hafi skýr markmið með náminu/kennslustundum/fjarfundum.

• Lykilatriði tæknilega er að nota það sem kennarar treysta sér til að nota og hafa notað áður.

• Lykilatriði er að setja nemendunum fyrir verkefni sem fara á dýptina, taka tíma og eru lengi í vinnslu.

Fleiri góð ráð og hlekkir í hugmyndir - í ítarlegra bloggi frá því fyrr í vikunni 

Margt gott og gagnlegt um fjarnám og kennslu frá Ingva Hrannari 

Kristrún Lind Birgisdóttir

Framkvæmastjóri Ásgarðs (áður Tröppu ráðgjöf)

Áður birt á bloggi Tröppu